Veðurspá Veðurklúbbsins á Dalbæ fyrir ágústmánuð

Veðurklúbbur Dalbæjar hefur nú gefið út veðurspá sína fyrir ágústmánuð. 

Fundur var haldinn í klúbbnum þriðjudaginn 6. ágúst en þá kviknar tungl í NV kl. 21:51. Ríkharði í Bakkagerði var alltaf illa við mánudags- eða þriðjudagstungl og minnugir þess telja fundarmenn að ágúst verði frekar misveðrasamur og að það komi ekki til með að hlýna að neinu ráði fyrr en eftir 21. ágúst en þá er fullt tungl.

Einn fundarmanna dreymdi mikinn afla af rauðmaga sem var keyrður fram í dal þar sem honum var sturtað á tún. Einn maður var látinn standa vörð um aflann til að allir fengju jafnt til skiptanna. Voru fundarmenn ásáttir um að þetta væri fyrir góðri sprettu þannig að flestir mættu vel við una.

Fiskidagskveðjur frá
Veðurklúbbnum á Dalbæ.