Íþróttaskóli barnanna er að hefjast

Íþróttaskólinn er 10 tíma námskeið sem hefst laugardaginn 15. september nk. Námskeiðið verður á laugardagsmorgnum í glæsilegu íþróttamiðstöðinni okkar frá kl. 11:00-12:00 og er ætlað börnum fæddum 2007-2010. Kennarar eru Harpa Rut Heimisdóttir íþróttafræðingur, M.S. og Valdís Guðbrandsdóttir iðjuþjálfi.

Mælt er með að börnin mæti í þægilegum fötum og berfætt svo þau nái sem bestu gripi á gólfinu og renni ekki til. Ætlast er til að foreldrar og/eða forráðamenn taki þátt í tímunum með börnunum og séu þeim til aðstoðar t.d. í áhaldahringjum, við klifur og fleira. Foreldrar og/eða forráðamenn bera alla ábyrgð á börnum sínum en námskeiðshaldarar reyna eftir fremsta megni að tryggja öryggi þeirra í æfingunum.

Markmið íþróttaskólans eru:

• að efla hreyfiþroska og hreyfigetu barnanna
• að auka úthald, sjálfstraust og vellíðan barnanna
• að losa um streitu og umfram orku
• að börnin læri á líkama sinn
• að efla samhæfingu
• að vernda heilsu barnanna
• að börnin læri ýmis stöðuhugtök, átti sig á rými, fjarlægðum og áttum
• að börnin læri að fara eftir reglum
• að hvetja börnin til áframhaldandi íþróttaiðkunar

Námskeiðsgjald fyrir 10 tíma er 7000 kr (veittur er 50% systkinaafsláttur). Tekið er við greiðslum í fyrsta tíma.

Skráningar skulu hafa borist fyrir fimmtudaginn 13. september á netföngin harpa@dalvikurbyggd.is  eða valdis@dalvikurbyggd.is  . Vinsamlegast skráið þá nafn barns, fæðingarár og símanúmer foreldri/forráðamanns.

Sjáumst hress og kát
Harpa Rut og Valdís