Allir leik og grunnskólar Dalvíkurbyggðar flagga grænfána

Fimmtudaginn 24. maí næstkomandi munu Dalvíkurskóli, leikskólinn Krílakot og leikskólinn Kátakot flagga grænafánanum. Leikskólinn Leikbær hefur nú þegar flaggað grænfánanum og í Tónlistarskóla Dalvíkurbyggðar er verið að vinna að flöggun. Þennan dag munu því allir leik- og grunnskólar Dalvíkurbyggðar hafa náð þeim frábæra áfanga að vera Grænfánaskólar og mega því flagga grænfánanum.

Síðan árið 2008 hefur verið unnið markvisst að því að allir skólar sveitarfélagsins séu skólar á grænni grein, en það var staðfest með leikskólastefnu sveitarfélagsins sem segir að allir leikskólar þess skuli vera Grænfánaskólar. Þannig tók sveitarfélagið markvissa stefnu í þessum mikilvæga málaflokki og þegar tónlistarskóli sveitarfélagsins hefur flaggað sínum fána verða allar skólastofnanir sveitarfélagsins Grænfánaskólar.

Það eru fulltrúar Landverndar sem afhenda Grænfánann en Landvernd stýrir Grænfánaverkefninu á Íslandi. Grænfáninn er alþjóðlegt verkefni með það að markmiði að auka umhverfismennt og styrkja umhverfisstefnu í skólum. Þeir skólar sem vilja komast á græna greina í umhverfismálum þurfa að stíga skrefin sjö, en það eru ákveðin verkefni sem efla vitund nemenda, kennara og annarra starfsmanna skólans um umhverfismál. Grænfáninn er veittur til tveggja ára í senn og að þeim liðnum þurfa skólar að gangast undir nýtt mat til þess að fá að flagga fánanum áfram.