67.000 ferðmenn í Dalvíkurbyggð

67.000 ferðmenn í Dalvíkurbyggð

Nú er komin út skýrsla sem ber nafnið Ferðamenn á Dalvík 2001-2004 en fyrirtækið Rannsóknir - og ráðgjöf ferðaþjónustunnar sáu um að vinna skýrsluna fyrir Dalvíkurbyggð. Samkvæmt skýrslunni var fjöldi erlendra ferðamanna í Dalvíkurbyggða á síðast ári í kringum 17.000 manns og fjöldi innlendra ferðamanna er áætlaður um 50.000 manns.

Þær niðurstöður um innlenda og erlenda ferðamenn til Dalvíkur sem kynntar eru í skýrslunni byggja á tveimur könnunum. Meðal Íslendinga eru gerða símakannanir, ein á ári, þar sem úrtak í hvert sinn er 1200 manns á aldrinum 18-78 ára og er svarhlutfall á bilinu 68-71%.  Á meðal erlendra ferðamanna eru lagðar fyrir kannanir sem bera nafnið Dear Visitor, en þær eru lagðar fyrir flugfarþega í Leifsstöð og meðal Norrænufarþega á Seyðisfirði. Alls svöruðu 6046 erlendir ferðamenn könunninni 2004.

Þegar skoðaðar eru niðurstöður fyrir erlenda ferðamenn kemur í ljós að árið 2004 komu 17.000 gestir til Dalvíkur. Stærstur hluti þeirra kom á tímabilinu júní - september eða um 14.000 manns. Ekki er munur á komu erlendra ferðamanna til Dalvíkur eftir kyni eða aldri, en reiknaður meðalaldur gesta er rúmlega 42 ár. Þegar skoðaðar er frá hvaða löndum þeir erlendur gestir eru sem koma hingað má sjá að stærstur hluti þeirra er frá Mið - Evrópu, alls 3.800, Suður - Evrópu, alls 3.700, og Norðurlöndunum, alls 2.700. Um það bil 83% erlendra ferðamanna á Dalvík kemur á eigin vegum en það helst í hendur við það að rúmlega 20% erlendra gesta á Dalvík koma til landsins með Norrænu.  

Samkvæmt könnuninni er áætlað að yfir 50.000 Íslendingar hafi komið til Dalvíkur á síðasta ári í rúmlega 100.000 heimsóknum og benda niðurstöðurnar til þess að ferðamönnum á Dalvík hafi fjölgað umtalsvert. Aldurshópurinn sem mest sækir Dalvík heim er 46-55 ára. Íbúar af Norðurlandi eystra komu hlutfallslega mest til Dalvíkur á síðasta ári, þá fólk af Norðurlandi vestra en íbúar Vestfjarða komu minnst.

Síðastliðið haust fór af stað stefnumótunarvinna í ferðaþjónustu í Dalvíkurbyggð, þar sem ákveðinni aðferðafærði sem byggir á ferðamennsku í dreifbýli er beitt. Stefnt er að því að ljúka þeirri vinnu í næstkomandi haust og verða niðurstöður þessara skýrslu nýttar til að skjóta sterkari stoðum undir þá vinnu. Skýrsluna er hægt a nálgast í heild sinni á heimasíðu Dalvíkurbyggðar www.dalvik.is eða með því að smella hér.