Byggðaráð

Á 953. fundi byggðaráðs kynnti sviðsstjóri fjármála- og stjórnsýslusviðs fyrstu drög að fjárhagsramma vegna fjárhagsáætlunar 2021. Á milli funda hafa ekki verið gerðar tillögur að breytingum en nú liggur fyrir launaáætlun 2021 skv. þarfagreiningum stjórnenda og voru niðurstöður úr þeirri þarfagreiningu kynntar á fundinum í samanburði við rammaáætlun.

Til umræðu ofangreint.

Með fundarboði fylgdi fundargerð starfs- og kjaranefndar sveitarfélagsins frá 08.09.2020.
Á fundinum var til umfjöllunar erindi frá stjórnendum vegna launaáætlunar 2021.

Til umræðu ofangreint.

Tekið fyrir erindi, dagsett þann 31. ágúst 2020, frá nemendum og starfsfólki Árskógarskóla, ósk um að útbúnir verði hjólastígar á Árskógsströnd þannig að nemendur geti hjólað í skólann og farið á milli byggðakjarna án þess að hjóla á þjóðveginum.

Tekið fyrir erindi frá Ragnheiði Ýr Guðjónsdóttur, samanber rafpóstur dagsettur þann 7. september 2020, sem óskar eftir því að leikvellir við Árskógarskóla verði teknir í gegn og tæki sem séu úrelt verði endurnýjuð og þeim fjölgað. Einnig bendir hún á hættur á leiksvæði skólans og leikskólans í Árskógi sem þurfi að laga.

Tekið fyrir erindi frá íbúaráði á Árskógssandi, samanber rafpóstur dagsettur þann 7. september 2020, þar sem lagðar eru fram tillögur vegna fjárhagsáætlunar 2021.
Tillögurnar eru í 12 liðum og snúa að umhverfis- og tæknisviði, veitu- og hafnasviði og eignasjóði. Efst á lista er göngustígur meðfram Árskógssandsvegi og skjólgarðar og flotbryggja í Árskógssandshöfn.

Einnig er minnt á verkefni sem eru á framkvæmdaáætlun 2020 og er ekki lokið, götulýsingu, uppsetning ærslabelgs, malbikun gatna og fráveitustöð.

Tekið fyrir erindi frá íbúum á Hauganesi dagsett 6. september 2021, þar sem lagðar eru fram níu tillögur vegna fjárhagsáætlunar 2021. Efst á blaði eru lagfæring Aðalgötu, gangstéttar og fjölgun bílastæða. Einnig göngu- og hjólastígur meðfram Hauganesvegi.

Einnig eru fyrirspurnir til sveitarfélagsins varðandi deiliskipulag fyrir Hauganes, mokstursmál fyrir veturinn, hreinsistöðina, grjótnámuna,leikvöllinn, dýrahald, slátt og almenna hirðu á Hauganesi.

Þá þakka íbúarnir fyrir allt það sem gert var í
sumar og eru sammála um að alltaf er hægt að gera gott betra.

Tekin fyrir erindi frá Sólrúnu ehf. dagsett 7. september 2020, annars vegar erindi er varðar hafnaraðstöðu á Árskógssandi, þörf fyrir endurbætur og niðursetning flotbryggju. Bent er á að frekari uppbygging hafnarinnar sé forsenda fyrir útgerð og almennri uppbygginu á Árskógssandi. Hins vegar erindi er varðar viðhald á Sjávargötu á Árskógssandi.

Tekið fyrir erindi, samanber rafpóstur dagsettur þann 24. ágúst 2020, frá lóðarhöfum á Hamri og sumarhúsalóðum 2-7 í landi Hamars, ósk um að vegurinn í frístundabyggðinni í landi Hamars verði endurbættur. Einnig koma fram ábendingar um snjómokstur og sorpgáma.

Tekinn fyrir rafpóstur dagsettur þann 4. september 2020 frá Berglindi og Magnúsi á Hrafnsstöðum er varðar ósk um þátttöku Dalvíkurbyggðar í girðingum á landamerkjum Hrafnsstaða við Dalvíkurbyggð og Ytra-Holt.

Tekið fyrir erindi frá Ellu Völu Ármannsdóttur og íbúum Böggvisstaða dagsett 4. september 2020, þar sem óskað er eftir að Dalvíkurbyggð taki frá fjármagn á fjárhagsáætlun 2021 til að:
1) Laga heimkeyrslu að Böggvisstöðum.
2) Færa inngang í Böggvisstaðaskála.
3) Taka til og ganga frá í kring um Böggvisstaðaskála.

Íbúarnir lýsa ánægju sinni með nýjan göngustíg frá Dalvík að Böggvisstaðaafleggjara og að lokað sé fyrir bílaumferð frá Dalvík stystu leið að Böggvisstöðum.

Tekið fyrir erindi frá Rúnu Kristínu Sigurðardóttur, dagsett 3. september 2020, ábending vegna fjárhagsáætlunargerðar 2021. Óskað er eftir því að leikvöllurinn í utanbænum, norðan við Ægisgötuna verði bættur betri leiktækjum.

Tekið fyrir munnlegt erindi frá Myriam Dalstein, dagsett þann 7. september 2020, vegna fjárhagsáætlunar 2021. Erindið snýr að bílastæðum í Svarfaðardal vegna ferðamanna að Skeiðsvatni, sorpmálum í sveitinni á veturna og að staða húsvarðar við Dalvíkurskóla verði endurvakin.

Tekið fyrir erindi frá Kristínu Aðalheiði Símonardóttur dagsett 7. september 2020 þar sem vakin er athygli á fimm atriðum sem mætti hafa í huga við gerð fjárhagsáætlunar 2021.
1. Hallandi gólf í Ungó verði fjarlægt.
2. Snyrtingar í Ungó verði lagfærðar.
3. Brú verði sett yfir hitaveiturörið á Svarfaðardalsá.
4. Gilið í Brimnesá verði gert að meira aðdráttarafli fyrir ferðafólk.
5. Miðbær Dalvíkur fái upplyftingu.

Tekið fyrir erindi frá Leikfélagi Dalvíkur dagsett 7. september 2020 þar sem óskað er eftir framkvæmdum og/eða viðbótum við salernisaðstöðu við aðalinngang í Ungó.

Tekið fyrir erindi frá Sóknarnefnd Dalvíkurkirkju dagsett 26. ágúst 2020, þar sem óskað er eftir að greiðsla frá Dalvíkurbyggð fyrir efni í girðingu í kringum Upsakirkjugarð verði sett á fjárhagsáætlun 2021.

Tekið fyrir erindi frá Sóknarnefnd Dalvíkursóknar dagsett 29. júní 2020, þar sem óskað er eftir fjárstyrk á fjárhagsáætlun 2021 á móti fasteignagjöldum Dalvíkurkirkju.

Tekið fyrir erindi frá Sóknarnefnd Stærri-Árskógskirkju, samanber rafpóstur dagsettur þann 7. september 2020, þar sem óskað er eftir því að lagfæring og malbikun bílastæðis við kirkjuna verði sett inn í fjárhagsáætlun fyrir árið 2021. Jafnframt óskar sóknarnefndin eftir því að Dalvíkurbyggð aðstoði við að þrýsta á Vegagerðina að lagfæra og leggja klæðningu á heimreiðina að kirkjunni.

Guðmundur St. Jónsson vék af fundi kl. 15:02 vegna vanhæfis.

Tekið fyrir erindi frá Fiskideginum Mikla, samanber rafpóstur dagsettur þann 8. september (tilkynning um erindi barst 7. september 2020), þar sem óskað er eftir auknu fjármagni á fjárhagsáætlun 2021 sem yrði sérmerkt vegna 20 ára afmælis Fiskidagsins Mikla.

Einnig er mælt með að sveitarfélagið geri ráð fyrir auknum kostnaði vegna gæslu og til að efla svæðið í kringum tjaldstæðin.

Tekið fyrir erindi frá Golfklúbbnum Hamri dagsett 7. september 2020, þar sem raktar eru fyrirhugaðar framkvæmdir við Arnarholtsvöll árin 2021-2024 ásamt kostnaðartölum. Til þess að geta farið í framkvæmdir og uppbyggingu á vellinum ásamt endurnýjun á vélakosti og byggingu á vélageymslu þá er óskað eftir auknu fjármagni frá Dalvíkurbyggð frá því sem var í þriggja ára áætlun 2021-2023.

Guðmundur St. Jónsson kom inn á fundinn að nýju kl. 15:04.

Tekin fyrir fundargerð Öldungaráðs frá 25. júní 2020 en í fundargerðinni kemur fram ósk frá Félagi eldri borgara um að endurskoða samning frá 2014 í tengslum við fjárhagsáætlun 2021.

Tekið fyrir erindi Jóhanns Karls Sigurðssonar og Braga V. Bergmanns fh. fyrrum starfsmanna blaðsins Dags á Akureyri, dags. 20.08.2020 þar sem óskað er eftir fjárhagsstuðningi vegna ritunar og útgáfu bókar um Sögu Dags á Akureyri 1918-1996. Áætlað er að bókin komi út haustið 2021.

Bókað í trúnaðarmálabók.

Á 953. fundi byggðaráðs þann 3. september 2020 var tekinn fyrir kaupsamingur / afsal um jörðina Selá, frá Ríkiseignum, en afgreiðslu var frestað með vísan í upplýsingar frá sveitarstjóra um atriði sem standa enn út af. Með fundarboði byggðaráðs fylgdu drög að kaupasamningi / afsali sem barst 9. september 2020 og minnisblað sveitarstjóra dagsett þann 10. september 2020.

Til umræðu ofangreint.

Á 953. fundi byggðaráðs þann 3. september s.l. var til umfjöllunar stöðumat stjórnenda vegna stöðu bókhalds í samanburði við heimildir í fjárhagsáætlun 2020. Frekari yfirferð var frestað.

Sviðsstjóri fjármála- og stjórnsýsusviðs gerði grein fyrir mati stjórnenda samkvæmt framlögðu minnisblaði.

Á 951. fundi byggðráðs þann 20. ágúst s.l. samþykkti byggðaráðs að greiða kennslukostnað umfram skólagjöld vegna nemenda við Tónlistarskólann á Akureyri og fól sviðsstjóra fræðslu- og menningarsviðs að koma inn með erindi vegna viðauka þegar bréf frá skólanum lægi fyrir um málið.

Með fundarboði byggðaráðs fylgdi bréf Tónlistarskólans á Akureyri sem og beiðni sviðsstjóra um viðauka við fjárhagsáætlun 2020, dagsett þann 1. september 2020, að upphæð kr. 353.820 fyrir árið 2020 en heildarkostnaður skólaárið 2020-2021 yrði kr. 707.640.

Tekið fyrir erindi frá sviðsstjóra umhverfis- og tæknisviðs, dagsett þann 8. september 2020, þar sem óskað er eftir viðauka við fjárhagsáætlun 2020 vegna snjómoksturs. Fram kemur að fjármagn vegna snjómoksturs fyrir árið 2020 er uppurið og rúmlega það. Staða á 10600-4949 er nú kr. 49.912.892 og óskað er eftir kr. 11.905.540 til viðbótar út árið.

Með fundarboði fylgdi einnig svar frá Jöfnunarsjóði, dagsett þann 4. september 2020, sem hafnar beiðni Dalvíkurbyggðar um viðbótarframlag vegna íþyngjandi snjómoksturs veturinn 2020 í ljósi tekjufalls sjóðsins og áhrif þess á framlög sjóðsins.

Tekið fyrir erindi frá Laxós ehf. dagsett 26. ágúst 2020, þar sem farið er yfir stöðu verkefnis vegna fyrirhugaðs seiðaeldis á Árskógssandi. Óskað er eftir nánari upplýsingum um tvennt:
1. Hvort leyfi muni fást til að lengja fyrirhugaða landfyllingu á Árskógssandi til austurs.
2. Hvort sveitarfélagið muni geta afhent það magn af vatni sem félagið þarf í framtíðinni.

Sviðsstjóri fjármála- og stjórnsýslusviðs kynnti tillögu að breytingum á erindisbréfi UT-teymis sveitarfélagsins.

Teknar fyrir til kynningar leiðbeiningar innleiðingarhóps Samband íslenskra sveitarfélga um betri vinnutíma, samanber rafpóstur dagsettur þann 25. ágúst 2020, styttingu vinnuviku samkvæmt kjarasamningum. Gert er ráð fyrir að niðurstaða samtals á vinnustað um breytt skipulag á vinnutíma liggi fyrir 1. október 2020 og að nýtt fyrirkomulag vinnutíma taki gildi eigi síðar en 1. janúar 2021.

Sveitarstjóri gerði grein fyrir stöðu mála varðandi ofangreint hjá Dalvíkurbyggð.

Lagður fram til kynningar ársreikningur Flokkun Eyjafjörður ehf. ásamt fundargerð stjórnarfundar 28. ágúst 2020 og fundargerð aðalfundar 28. ágúst 2020.

Lögð fram til umfjöllunar og kynningar fundargerð stjórnar Sambands íslenskra sveitarfélaga frá 28.08.2020, nr. 886.

Með fundarboði fylgdu starfslýsingar sviðsstjóra fjármála- og stjórnsýslusviðs og sviðsstjóra veitu- og hafnasviðs til yfirferðar í byggðaráði.