Umhverfisráð

Með umsókn, dagsettri 10. nóvember 2021, óskar Tréverk ehf. eftir parhúsalóðinni við Hringtún 13-15 á Dalvík. Meðfylgjandi er rökstuðningur fyrir úthlutun lóðarinnar til Tréverks ehf.

Með umsókn, dagsettri 11. nóvember 2021, óska EGO hús ehf. eftir parhúsalóðinni við Hringtún 13-15 á Dalvík. Meðfylgjandi er rökstuðningur fyrir úthlutun lóðarinnar til EGO húsa ehf.

Lögð fram tillaga að breytingu á aðalskipulagi Dalvíkurbyggðar 2008-2020 þar sem landnotkun og stærð þéttbýlissvæðis við Hauganes er breytt til samræmis við deiliskipulagstillögu fyrir Hauganes.

Lögð fram deiliskipulagstillaga fyrir Hauganes unnin af Ágústi Hafseinssyni hjá Form ráðgjöf ehf. Deiliskipulagstillagan samanstendur af uppdrætti dagsettum 22. nóvember 2021 og greinargerð.

Lögð fram deiliskipulagstillaga fyrir þjóðveginn í gegn um Dalvík unnin af Eflu ehf. í samvinnu við Vegagerðina. Tillagan samanstendur af uppdráttum og greinargerð dagsettum 26. nóvember 2021.

Lögð fram tillaga að breytingu á deiliskipulagi Hóla- og Túnahverfis á Dalvík þar sem breytingar eru gerðar á stærð lóðanna að Skógarhólum 11 og Skógarhólum 23 a,b,c og d til þess að koma fyrir nýrri húsagötu í eigu og rekstri Dalvíkurbyggðar.

Lögð fram skipulags- og matslýsing fyrir breytingu á Aðalskipulagi Dalvíkurbyggðar 2008-2020 ásamt aðalskipulagi Hörgársveitar og Akureyrar vegna Dalvíkurlínu 2. Lýsingin er unnin af Verkís fyrir hönd Landsnets.

Með tölvupósti, dagsettum 23. nóvember 2021, óskar Sigríður Hrefna Pálsdóttir fyrir hönd skipulags- og byggingafulltrúa Eyjafjarðar eftir umsögn um skipulagslýsingu fyrir deiliskipulag nýs áfanga Lónsbakkahverfis ásamt skipulagslýsingu tilheyrandi aðalskipulagsbreytingar.

Með umsókn, dagsettri 15. nóvember 2021, óskar Georg William Bagguley eftir endurnýjun á útrunnum lóðarleigusamningi fyrir Karlbraut 22 á Dalvík.

Erindi frestað til næsta fundar.

Lögð fram til kynningar gjaldskrá fyrir sorphirðu í Dalvíkurbyggð árið 2022.

Tekið fyrir erindi frá SSNE, rafpóstur dagsettur þann 8. nóvember 2021, þar sem kemur fram að sem kunnugt er er "Svæðisáætlun um meðhöndlun úrgangs á Norðurlandi 2015-2026" í gildi á Norðurlandi fyrir svæðið frá Hrútafirði í vestri að Melrakkasléttu í austri og byggir áætlunin á lögum nr. 55/2003, um meðhöndlun úrgangs. Þar segir í 6. grein:

"Sveitarstjórn, ein eða fleiri í sameiningu, skal semja og staðfesta svæðisáætlun um meðhöndlun úrgangs sem gildir fyrir viðkomandi svæði til tólf ára í senn og skal sú áætlun fylgja stefnu um meðhöndlun úrgangs og stefnu um úrgangsforvarnir,"

Og sömuleiðis segir í 6. grein:

Sveitarstjórn skal á a.m.k. sex ára fresti meta og taka ákvörðun um hvort þörf er á að endurskoða svæðisáætlun um meðhöndlun úrgangs.

Fram kemur að það sé orðið tímabært að taka ákvörðun um hvort þörf sé á því að endurskoða svæðisáætlunina, annars vegar vegna ofangreinds lagaákvæðis og hins vegar vegna áorðinna og fyrirsjáanlegra breytinga í lagaumhverfi varðandi úrgangsmál. Vegna þeirra breytinga sem verða 1. janúar 2023 má telja það mjög brýnt að endurskoðun fari fram fyrr en seinna.

Með erindi, dagsettu 2. nóvember 2021, tilkynnir Karl Björnsson fyrir hönd Sambands íslenskra sveitfélaga að von sé á handbók um úrgangsstjórnun sveitarfélaga sem eigi að vera tilbúin í byrjun næsta árs. Enn fremur eru sveitarstjórnir um allt land hvattar til að hefja nú þegar undirbúning fyrir gildistöku lagabreytinga um hringrásarhagkerfi sem taka á gildi 1. janúar 2023.

Erindi frestað.

Tekin fyrir tölvupóstur dgsettur 17. nóvember 2021 frá Önnu Kristínu Guðmundsdóttur þar sem hún fyrir hönd Teiknistofu Norðurlands óskar eftir samstarfi við Dalvíkurbyggð um umsókn í Framkvæmdasjóð ferðamannastaða til þess að vinna að hönnun á gönguleiðum, útsýnispöllum og dvalarsvæðum meðfram strandlínunni á Dalvík.

Tekinn fyrir tölvupóstur frá Herði Finnbogasyni starfsmanni Skíðafélags Dalvíkur þar sem hann óskar leyfis fyrir skiltum við Skíðabraut og Mímisveg til að auglýsa skíðasvæðið í Böggvisstaðafjalli.

Lögð fram til kynningar fundargerð 9. afgreiðslufunda byggingafulltrúa Dalvíkurbyggðar.