Byggðaráð

Undir þessum lið koma á fund byggðarráðs Börkur Þór Ottósson, sviðsstjóri umhverfis- og tæknisvið, kl. 8:15.

Til umfjöllunar drög að nýrri starfslýsingu umsjónarmanns fasteigna, en byggðarráðs er stjórn Eignasjóðs.

Undir þessum lið kom á fund byggðarráðs kl. 9:10 Þorsteinn Gunnar Þorsteinsson, löggiltur endurskoðandi sveitarfélagsins frá KPMG á Akureyri, Anna Guðný Karlsdóttir, aðamaður í sveitarstjórn, Börkur Þór Ottósson, sviðsstjóri umhverfis- og tæknisviðs, Eyrún Rafnsdóttir, sviðsstjóri félagsmálasviðs, Hildur Ösp Gylfadóttir, sviðsstjóri fræðslu- og menningarsviðs, og Þorsteinn K. Björnsson, sviðsstjóri veitu- og hafnasviðs.

Allir aðalmenn í sveitarstjórn og sviðsstjórar voru boðaðar á fundinn undir þessum lið.

Þorsteinn G. Þorsteinsson fór yfir helstu niðurstöður og forsendur ársreiknings 2013.

Rekstrarniðurstaða samstæðu er jákvæð um kr. 78.889.000. Handbært fé frá rekstri er jákvætt um kr. 267.574.000. Fjárfestingar í varanlegum rekstrarfjármunum voru kr. 170.162.000. Lántaka var kr. 80.000.000 og afborgun lána kr. 125.739.000.

Samkvæmt sveitarstjórnarlögum skal ársreikningur fullgerður og samþykktur af byggðarráði og tilbúinn til endurskoðunar og afgreiðslu í sveitarstjórn fyrir 15. apríl ár hvert.

Þorsteinn G., Anna Guðný, Börkur Þór, Eyrún, Hildur Ösp og Þorsteinn viku af fundi kl. 10:07.

Tekið fyrir bréf frá Jöfnunarsjóði sveitarfélaga, dagsett þann 2. apríl 2014, þar sem fram kemur að nú hefur farið fram endurskoðun á áætlunum um úthlutanir einstakra framlaga sjóðsins til sveitarfélaga á árinu 2014 að teknu tilliti til ráðstöfunarfjármagns sjóðsins á grundvelli fjárlaga ársins 2014, endanlegs álagningarstofns útsvars fyrir árið 2012, uppfærðrar stöðu áætlaðs stofns fyrir árið 2014 og íbúafjölda miðað við 1. janúar 2014 eftir því sem við á. Frétt þar að lútandi var birt á vefsíðu sjóðsins 1. apríl s.l. og þar má sjá niðurstöður fyrir hvert sveitarfélag eftir tegundum framlaga og jafnframt áætlaða heildartölu framlaga fyrir hvert sveitarfélag á árinu 2014.

Með fundarboði byggðarráðs fylgdi samantekt sviðsstjóra fjármála- og stjórnsýslusviðs er sýnir áætluð framlög Jöfnunarsjóðs samkvæmt fjárhagsáætlun 2014 í samanburði við endurskoðaða áætlun Jöfnunarsjóðs sveitarfélaga um framlög 2014, sbr.3. liður hér að ofan.

Ef gert er ráð fyrir að tekjujöfnunarframlagið verði samkvæmt áætlun, en áætlað framlag frá JS liggur ekki fyrir, þá eru áætluð framlög um 11 m.kr. undir áætlun sveitarfélagsins.

Tekið fyrir bréf frá Símey, dagsett þann 2. apríl 2014, þar sem boðað er til ársfundar miðvikudaginn 16. apríl 2014 kl. 14 ö kl. 15:45 að Þórstíg 4 á Akureyri.

Tekið fyrir bréf frá Lánasjóði sveitarfélaga, dagsett þann 2. apríl 2014, þar sem fram kemur að á aðalfundi sjóðsins þann 27. mars s.l. var samþykkt að greiða út arð til hluthafa vegna góðrar afkomu ársins 2013. Hlutur Dalvíkurbyggðar er 1,347% og nemur því arðgreiðslan kr. 4.822.260. Þegar búið er að taka af 20% fjármagnstekjuskatt þá kemur til útborgunar kr. 3.857.808.

Samkvæmt fjárhagsáætlun Dalvíkurbyggðar fyrir árið 2014 þá var gert ráð fyrir kr. 4.396.608 að teknu tillit til fjármagnstekjuskatts, sbr. arður 2013.

Tekið fyrir rafbréf frá Þjóðskrá Íslands, dagsett þann 7. apríl 2014, þar sem fram kemur að laugardagurinn 10. maí 2014 er viðmiðunardagur kjörskrár vegna sveitarstjórnarkosninganna sem hafa verið auglýstar þann 31. maí 2014. Þjóðskrá Íslands vill af þessu tilefni minna á nauðsyn þess að íbúaskráningin sé sem réttust.

Samkvæmt 13. gr. upplýsingalaga nr. 140 frá 28. desember 2012 þá segir meðal annars:

13. gr. Birting upplýsinga að frumkvæði stjórnvalda.
Stjórnvöld skulu veita almenningi með reglubundnum hætti upplýsingar um starfsemi sína, svo sem með rafrænni útgáfu skýrslna, samantektum um mikilvæg verkefni eða útgáfu annarra gagna.
Stjórnvöld skulu vinna markvisst að því að gera skrár yfir mál, lista yfir málsgögn og gögnin sjálf jafnóðum aðgengileg með rafrænum hætti. Hið sama á við um gagnagrunna og skrár. Þess skal gætt að birting gangi ekki gegn einka- eða almannahagsmunum.

Með fundarboði byggðarráðs fylgdi yfirlit yfir helstu birgja Dalvíkurbyggðar á árinu 2013.

Samkvæmt fjárhagsáætlunarferli Dalvíkurbyggðar, grein 3.4. Umbun og hvatning, þá er gert ráð fyrir að sem liður í hvatningu til stjórnenda og starfsmanna Dalvíkurbyggðar og sem umbun fyrir góðan árangur í rekstri samhliða faglegu starfi er byggðarráði heimilt, að undangenginni umsögn framkvæmdastjórnar, að veita tilteknum vinnustað og/eða vinnustöðum Dalvíkurbyggðar umbun úr sérstökum potti á fjárhagsáætlun (deild 21-02), nú fyrst árið 2014 að upphæð kr. 500.000 en þó aldrei meira en kr. 50.000 á hvert stöðugildi. Umbunin skal nýtt til þess að bæta starfsumhverfi starfsmanna og er það á höndum viðkomandi stjórnanda / starfsmanna að ákvarða hvernig umbunin skal nýtt í þágu vinnustaðarins / starfsmanna.

Þegar niðurstöður undanliðins fjárhagsárs liggja fyrir skal framkvæmdastjórn senda byggðarráði rökstudda tillögu. Ef tillögur framkvæmdastjórnar eru ekki einróma skal meirihluti atkvæða ráða. Byggðarráð tekur ofangreint til umfjöllunar og afgreiðslu á fundi sínum.

Tekið fyrir erindi frá Sigurði Hafsteini Pálssyni og Svanfríði Jónsdóttur, bréf dagsett þann 18. mars 2014, þar sem þau óska eftir heimild Dalvíkurbyggðar til að skrá lögheimili sitt í frístundahúsi þeirra í landi Hamars í Dalvíkurbyggð.

Tekið fyrir erindi frá leikskólastjóra, bréf dagsett þann 7. apríl 2014, þar sem vísað er til bréfs til byggðarráðs þann 3. september 2013 þar sem fram kom að uppvöskunarvél í Kátakoti var orðin lúin og spurning hversu lengi hún myndi endast. Nú hefur vélin gefið upp öndina og þurfti leikskólastjóri að fjárfesta í nýrri vél að upphæð kr. 317.726. Leikskólastjóri óskar því eftir viðauka við fjárhagsáætlun vegna þessa.