Byggðaráð

Undir þessum lið komu á fund byggðaráðs Eyrún Rafnsdóttir, sviðsstjóri félagsmálasviðs, Gísli Bjarnason, sviðsstjóri fræðslu- og menningarsviðs og Gísli Rúnar Gylfason, íþrótta-og æskulýðsfulltrúi, kl. 13:00.

Á 1003. fundi byggðaráðs þann 28. október sl. var til umfjöllunar og afgreiðslu tilnefning fulltrúa Dalvíkurbyggðar vegna innleiðinar á nýjum lögum um samþættingu þjónustu í þágu farsældar barna nr. 86/2021. Sveitarstjórn staðfesti tillögu byggðaráðs á fundi sínum 2. nóvember sl. um að sviðsstjóri félagsmálasviðs verði fulltrúi Dalvíkurbyggðar og sviðsstjóri fræðslu- og menningarsviðs til vara. Byggðaráð óskaði eftir að fá sviðsstjórana á fund ásamt íþrótta- og æskulýðsfulltrúa til þess að ræða og fara yfir hvað þessi samþætting hefur í för með sér og áhrif á starfsemi sveitarfélagsins.

Á fundinum var farið yfir kynningu frá Eyrúnu, Gísla og Gísla Rúnari um samþættingu þjónustu í þágu farsældar barna.

Eyrún, Gísli og Gísli Rúnar viku af fundi kl. 13:27.

Undir þessum lið kom á fund byggðaráðs Bjarni Daníel Bjarnason, sviðsstjóri framkvæmdasviðs, kl. 13:35.

Til umræðu uppbygging og framtíðarsýn fyrir Framkvæmdasvið hvað varðar starfssemi, verkefni og starfsmannahald eftir þær skipulagsbreytingar sem gerðar voru í byrjun ársins.

Bjarni Daníel vék af fundi kl. 14:23.

Á 339. fundi sveitarstjórnar þann 2. nóvember sl. var frumvarp að fjárhagsáætlun Dalvíkurbyggðar 2022 tekið til fyrri umræðu ásamt þriggja ára áætlun 2023-2025. Samþykkt var samhljóða að vísa áætlunni til byggðaráðs á milli umræðna í sveitarstjórn.

Til umræðu almennt.

Sveitarstjóri vék af fundi kl. 14:56.

Með fundarboði byggðaráðs fylgdi frá Sambandi íslenskra sveitarfélaga staðgreiðsluáætlun 2021 og 2022.

Fram kom á fundinum að búið er að taka mið af áætluninni í tengslum við útkomuspá 2021 og fjárhagsáætlun 2022.

Til umfjöllunar álagning útsvars fyrir árið 2022.

Til umfjöllunar álagningarprósenta fasteignaskatts og lóðarleigu sem og þjónustugjöld fasteigna vegna sorphirðu, vatnsveitu og fráveitu.

Á 1003. fundi byggðaráðs þann 28. október sl. og 339. fundi sveitarstjórnar þann 2. nóvember sl. voru fyrirliggjandi tillögur að gjaldskrám til umræðu.

Á 993 fundi byggðaráðs þann 19. ágúst sl. var eftirfarandi bókað:
"Á 360. fundi umhverfisráðs þann 13. ágúst sl. var eftirfarandi bókað: "Kl. 9:00 kom Anton Hallgrímsson slökkviliðsstjóri og sat fundinn undir þessum lið. Lögð fram eftirlitsskýrsla Vinnueftirlitsins eftir reglubundna skoðun í Slökkvistöð Dalvíkur þann 26. júlí sl. Anton Hallgrímsson vék af fundi kl. 9:45. Umhverfisráð fór yfir skýrsluna og leggur til við byggðaráð að stofnaður verði vinnuhópur um stefnumótun og framtíðarsýn fyrir Slökkvilið Dalvíkur. Samþykkt samhljóða með fimm atkvæðum."Byggðaráð samþykkir samhljóða með 3 atkvæðum að fela sveitarstjóra að koma með tillögu að vinnuhópi og erindisbréfi fyrir hópinn."

Fyrir liggur að búið er að samþykkja erindisbréf fyrir ofangreindan vinnuhóp en vinnuhópinn skipa slökkviliðsstjóri, sviðsstjóri framkvæmdasviðs og sveitarstjóri.

Með fundarboði fylgdi svarbréf frá Vinnureftirlitinu, dagsett þann 1. nóvember sl., þar sem fram kemur að Slökkvilið Dalvíkur hefur tímafrest til að senda inn tilkynningu um úrbætur til 15.11.2021 sem er framlenging frá 01.11.2021.

Með fundarboði byggðaráðs fylgdi rafpóstur frá Ríkiskaupum, dagsettur þann 27. október 2021, þar sem fram kemur að á næstu vikum munu Ríkiskaup, í samstarfi við Samband íslenskra sveitarfélaga, standa að útboði á slökkviliðsbílum. Það er markmið Ríkiskaupa að gerð útboðsgagna og framkvæmd útboðsins endurspegli fjölbreyttar þarfir slökkviliða og þeirra svæða sem þeim er ætlað að þjóna og verða þau unnin í samstarfi við kaupendur og fagaðila með sérþekkingu á málefnasviðinu.

Til að ná fram sem mestri hagkvæmni og virði fyrir sveitarfélög landsins köllum við eftir því að þau sveitar- og bæjarfélög sem hyggjast fjárfesta í slökkviliðsbílum á næstu 4-36 mánuðum og hafa áhuga á samstarfi við útboð hafi samband við sérfræðinga Ríkiskaupa og lýsi yfir áhuga (utbod@rikiskaup.is) fyrir 10. nóvember nk. Eftir 10. nóvember verður boðað til kynningarfundar þar sem farið verður yfir verkefnið og í framhaldinu geta sveitarfélög tekið ákvörðun um hvort þau vilja taka þátt eða ekki.

Sviðsstjóri fjármála- og stjórnsýslusviðs upplýsti að fjallað var um málið á fundi framkvæmdastjórnar/innkauparáðs á mánudaginn og innkauparáð getur mælt með að farin verði þessi leið, ef samþykkt verður sú tillaga sem liggur fyrir vegna fjárhagsáætlunar 2022 að festa kaup á nýjum slökkivliðsbíl.

Einnig liggur fyrir að áhugi er hjá Framkvæmdasviði og slökkviliðsstjóra Dalvíkurbyggðar að eiga samstarf við Ríkiskaup um sameiginlegt útboð.

Tekið fyrir erindi frá Slökkviliðsstjóra Dalvíkurbyggðar, dagsett þann 1. nóvember 2021, þar sem óskað er heimildar að fá að nota tekjur vegna útseldrar vinnu og endurgreiðslu á virðisaukaskatti, sem ekki var gert ráð fyrir í fjárhagsáætlun, að upphæð kr. 538.771 til að festa kaup á vinnufatnaði fyrir starfsmenn slökkviliðsins að upphæð kr. 244.162.

Tekið fyrir erindi frá deildarstjóra Eigna- og framkvæmdadeildar, dagsett þann 2. október 2021, þar sem óskað er eftir viðauka við fjárhagsáætlun 2021 að upphæð kr. 3.000.000 á deild 10600 vegna snjómoksturs. Fram kemur rökstuðningurinn fyrir beiðninni en það fjármagn sem var áætlað til snjómoksturs er við það að klárast.

Tekinn fyrir rafpóstur frá Jöfnunarsjóði sveitarfélaga þar sem fram kemur í frétt frá 1. nóvember sl. áætlun tekjujöfnunarframlags fyrir árið 2021. Framlag til Dalvíkurbyggðar er áætlað kr. -2.993.697.

Miðað er við meðaltekjur íbúa í sveitarfélögum með 300-11.999 íbúa eða 97% af þeim, kr. 760.626. Við útreikning framlaganna er gengið út frá hámarkstekjumöguleikum sveitarfélaga af útsvari og fasteignaskatti. Hámarkstekjur á hvern íbúa í Dalvíkurbyggð eru þannig áætlaðar kr. 757.199. Frávikið er því kr. 3.427 á hvern íbúa.

Með fundarboði byggðaráðs fylgdi greinargerð um starf Flugklasans Air 66N 9. apríl - 26. október 2021.

Tekinn fyrir rafpóstur frá Sambandi íslenskra sveitarfélaga, dagsettur þann 2. nóvember 2021, þar sem gert er grein fyrir hvatningu frá stjórn Sambandsins til sveitarstjórna um allt land til að hefja nú þegar undirbúning fyrir gildistöku lagabreytinga um hringrásarhagkerfi sem taka gildi 1. janúar 2023. Ljóst er að öll sveitarfélög munu þurfa að endurskoða þau stjórntæki sem þau hafa á grundvelli laga um meðhöndlun úrgangs, þ.e. svæðisáætlanir, samþykktir og gjaldskrár. Samband íslenskra sveitarfélaga hefur gert samning við VSÓ Ráðgjöf um gerð handbókar um úrgangsstjórnun sveitarfélaga sem verður tilbúin á fyrsta ársfjórðungi næsta árs. Einnig hefur Sambandið gert samning við EFLU verkfræðistofu um leiðir til að innleiða svonefnda "Borgaðu þegar þú hendir" aðferðafræði við gjaldtöku í málaflokknum.

Tekið fyrir erindi frá Sambandi íslenskra sveitarfélaga, rafpóstur dagsettur þann 2. nóvember 2021, þar sem gert er grein fyrir boði frá Landsvernd um þátttöku sveitarfélaga landsins í námskeiðinu Loftlagsvernd í verki. Þátttaka sveitarfélaganna yrði í boði frá janúar 2022. Námskeiðið er unnið í litlum hópum og tekur a.m.k. 6 vikur. Námskeiðið snýr að því að hver þátttakandi skoði eigin lífstíl og meti til hvaða aðgerða hann geti gripið til að draga úr kolefnissporinu.

Tekið fyrir erindi frá Sambandi íslenskra sveitarfélaga, dagsett þann 2. nóvember sl., þar sem kynnt er ályktun bæjarráðs Árborgar um leikskólmál sem tekin var fyrir á fundi stjórnar Sambandsins 29. október sl.

Bæjarráð Árborgar skorar á stjórn Sambandsins að beita sér fyrir fullri viðurkenningu ríkisvaldsins á leikskólastiginu sem menntastofnun með því að ríkisvaldið skilgreini sveitarfélögum tekjustofn til að standa straum af kostnaði við rekstur leikskóla frá lokum fæðingarorlofs. Jafnframt þarf að tryggja leiðir til að fjármagna þjónustu við fötluð börn á leikskólum og þau börn sem hafa annað móðurmál en íslensku, t.d. með jöfnunarframlögum.

Með fundarboði byggðaráðs fylgdu fundargerðir stjórnar Sambands íslenskra sveitarfélaga nr. 901 og nr. 902 frá 24. september sl. og 29. október sl.