Byggðaráð

a) Forsendur með fjárhagsáætlun 2022 og fylgigögn.

Sviðsstjóri fjármála-og stjórnsýslusviðs fór yfir forsendur með fjárhagsáætlun 2022 ásamt yfirliti yfir íbúaþróun og áhættugreiningu. Kynntar voru sérstaklega þær breytingar sem gerðar hafa verið frá síðasta fundi. Einnig var farið yfir stöðu innri viðskipta á milli Aðalsjóðs, Eignasjóðs og B-hluta fyrirtækjanna.

b) Tillaga að fjárhagsramma 2022.

Sviðsstjóri fjármála- og stjórnsýslusviðs fór yfir tillögu að fjárhagsramma vegna 2022 með þeim breytingum sem gerðar hafa verið frá síðasta fundi. Einnig var farið yfir launaáætlun 2022 og yfirlit áætlaðra stöðugilda 2022 út frá þarfagreiningu stjórnenda.


c) Heildarviðauki II við fjárhagsáætlun 2021.

Sviðsstjóri fjármála- og stjórnsýslusviðs fór yfir heildarviðauka II við fjárhagsáætlun 2021 með þeim breytingum sem gerðar hafa verið frá síðsta fundi þar sem búið er að bæta við viðaukum 17 og 18.

a) Tekið fyrir erindi frá Tónlistarskólanum á Akureyri, dagsett þann 20. ágúst 2021, þar sem vísað er í umsókn um nám við skólann frá aðila sem er með lögheimili í Dalvíkurbyggð. Ef Dalvíkurbyggð gengst undir þá ábyrgð að greiða kennslukostnaðinn þá mun skólinn samþykkja umsókn nemendans. Áætluð gjöld eru kr. 379.722 fyrir skólaárið 2021-2022. Dalvíkurbyggð getur síðan sótt um endurgreiðslur úr Jöfnunarsjóði sveitarfélaga sem yrði þá greitt af Jöfnunarsjóði að hluta til.
b) Tekið fyrir erindi frá sviðsstjóra fræðslu- og menningarsviðs, minnisblað dagsett þann 31. ágúst sl., þar sem óskað er eftir viðauka við fjárhagsáætlun 2021 að upphæð kr. 189.861 vegna ofangreindar umsóknar í a) lið.

Á 993. fundi byggðaráðs var sveitarstjóra falið að leggja fyrir byggðaráð tillögu að erindisbréfi fyrir vinnuhóp um stefnumótun og framtíðarsýn fyrir Slökkvilið Dalvíkur. Með fundarboði byggðaráðs fylgdi tillaga sveitarstjóra að erindisbréfi.

Með fundarboði byggðaráðs, sem er jafnframt stjórn Eignasjóðs, fylgdi frá framkvæmdasviði skýrsla BSI á Íslandi vegna aðalskoðunar á leikvellinum Krílakoti. Skoðun fór fram 12.07.2021.

Á fundi byggðaráðs var lögð fram til umfjöllunar og afgreiðslu kjörskrá vegna kosninga til Alþingis laugardaginn 25. september nk.

Á kjörskrá eru 1323.

Tekið fyrir bréf frá Samgöngu- og sveitarstjórnarráðuneytinu, dagsett þann 1. september 2021, er varðar breytingar á leiðbeiningum um ritun fundargerða og notkun fjarfundarbúnaðar. Fram kemur að ráðuneytið hefur birt í samráðsgátt Stjórnarráðsins drög að breytingum á leiðbeiningum um ritun fundargerða nr. 22/2013 og notkun fjarfundarbúnaðar nr. 1140/2013. Sveitarfélög eru hvött til að senda inn umsögn og huga jafnframt að breytingum á samþykktum sínum. Umsagnarfrestur er til 13. september nk.

Tekið fyrir fundarboð, dagsett þann 3. september 2021, um aukaþing Samtaka sveitarfélaga og atvinnuþróunar á Norðurlandi eystra, SSNE. Um er að ræða rafrænt aukaþing þann 1. október nk. Meðfylgjandi er dagskrá þingsins ásamt endurskoðaðri fjárhagsáætlun 2021, áætlun 2022 og greinargerð.

Tekið fyrir fundarboð frá Greiðri leið ehf., dagsett þann 1. september 2021, þar sem boðar til aðalfundar þriðjudaginn 14. september nk. kl. 13:00 í gegnum TEAMS.