Umsókn um lóð - Sandskeið 20

Umhverfisráð tekur mjög jákvætt í erindið en leggur áherslu á að ganga þurfi frá endurnýjun lóðarleigusamnings við lóðarhafa Sandskeiðs 22 áður en endanleg úthlutun lóðar að Sandskeiði 20 getur farið fram. Umhverfisráð felur skipulags- og tæknifulltrúa að ræða við lóðarhafa og ganga frá lóðarleigusamningum.
Samþykkt samhljóða með fimm atkvæðum.

Þar sem umrædd lóð (Baldurshagalóðin) er í raun ekki til í upprunalegri mynd telur umhverfisráð að áður en farið sé í að skilgreina og úthluta nýjum lóðum við Sandskeið þurfi deiliskipulag af svæðinu að liggja fyrir. Umhverfisráð leggur til að farið sé í að deiliskipuleggja athafnasvæðið við Sandskeið sem allra fyrst.
Samþykkt samhljóða með fimm atkvæðum.

Enginn tók til máls.

Sveitarstjórn samþykkir samhljóða með 7 atkvæðum ofangreinda afgreiðslu umhverfisráðs.

Umhverfisráð ítrekar að nauðsynlegt sé að deiliskipuleggja athafnasvæðið við Sandskeið og þegar það liggur fyrir og er samþykkt þá séu nýjar lóðir auglýstar lausar til umsóknar.

Umhverfisráð leggur til að vinna verði hafin sem allra fyrst við deiliskipulagsgerðina með það að markmiði að ljúka henni á vordögum 2022.

Enginn tók til máls.

Sveitarstjórn samþykkir samhljóða með 7 atkvæðum ofangreinda afgreiðslu umhverfisráðs.

Umhverfisráð vísar rökstuðningnum til umræðu og afgreiðslu í sveitarstjórn.

Til máls tók:
Katrín Sigurjónsdóttir.

Fleiri tóku ekki til máls.


Sveitarstjórn samþykkir samhljóða með 7 atkvæðum fyrirliggjandi drög að rökstuðningi með áorðnum breytingum sem gerðar voru á fundinum.

Rökstuðningur:
Eins og fram kemur hér að ofan þá staðfestir sveitarstjórn þann 21. september 2021 afgreiðslu umhverfisráðs og rök ráðsins frá 3. september sl. um að það þurfi að deiliskipuleggja svæðið áður en farið verði í að skilagreina og úthluta nýjum lóðum á umræddu svæði. Sveitarstjórn staðfestir jafnframt á fundi sínum þann 18. janúar sl. afgreiðslu umhverfisráðs og rök ráðsins frá 13. janúar sl. um að nauðsynlegt sé að deiliskipuleggja athafnasvæðið við Sandskeið og þegar það liggur fyrir samþykkt þá séu nýjar lóðir auglýstar lausar til umsóknar.

Samkvæmt upplýsingum frá starfsmönnum umhverfisráðs þá eru m.a. forsendur umhverfisráðs, samkvæmt umræðum, fyrir afgreiðslu sinni vísan í sambærileg mál sem komu upp í fyrra sumar, skipulag Sandskeiðs í heild sinni, skortur á lóðarleigusamningum og skilgreiningu á lóðum á svæðinu. Umrætt svæði þarfnist því heildarmats m.a. þar sem um hefur verið rætt í mörg ár um tilfærslu beygjunnar við Frón sem og endurskoðun á umhverfinu í heild sinni. Í samræmi við þessi áform þá fari ekki saman að úthluta lóð undir hús sem kemur til með að rísa og þá hugsanlega að það og viðkomandi lóð falli ekki inn í þá heildarmynd sem verið er að móta með deiliskipulagsferlinu.

Í skipulagslögum nr. 123/2010 segir í 37. gr. VIII. kafla um deiliskipulagsáætlanir; Deiliskipulag skal gera fyrir einstök svæði eða reiti þar sem framkvæmdir eru fyrirhugaðar og skal jafnan miða við að það taki til svæða sem mynda heildstæða einingu. Við gerð deiliskipulags skal byggt á stefnu aðalskipulags og hún útfærð fyrir viðkomandi svæði eða reit.

Fleiri dæmi er um að verið er að bíða með samskonar umsóknir þar til deiliskipulagsvinnu lýkur. Lóðir eru takmarkaðar auðlindir og því þarf að auglýsa nýjar lóðir til að allir hafi jafnan aðgang að þeim lóðum sem verða til í deiliskipulagsvinnunni. Það er skortur á lóðum fyrir atvinnustarfsemi. Í lýsingu með aðalskipulagi fyrir svæði 107_A kemur fram eftirfarandi ? þ.e. að uppbygging verði samkvæmt deiliskipulagi. (sjá mynd í lýsingu með aðalskipulagi, sbr. drög að svarbréfi).

Í úthlutunarreglum sveitarfélagsins um byggingalóðir segir m.a.;3.4. Annað Umhverfisnefnd er í sérstökum tilvikum heimilt að veita vilyrði fyrir lóðum, öðrum en einbýlishúsalóðum, án undangenginna auglýsinga, þegar sótt er um lóðir innan skipulagðra svæða eða á óskipulögðum svæðum, sem ekki hafa verið auglýstar sem byggingarlóðir. Endanleg úthlutun getur þó ekki farið fram fyrr en að loknum skipulagsbreytingum, sé þeirra þörf og að fengnu samþykki sveitarstjórnar.Samandregið þá er það mat umhverfisráðs og sveitarstjórnar að þörf sé á gerð deiliskipulags á þessu svæði. Enn fremur með því að fara í gegnum formlegt deiliskipulagsferli er verið að gefa fleiri íbúum og hagsmunaaðilum, en fæst til dæmis með grenndarkynningu, tækifæri til athugasemda í heild um umhverfið í kring.

Skipulagsráð felur framkvæmdasviði að gera tillögu að lóðablaði fyrir Sandskeið 20. Gætt verði að umferðaröryggi og svigrúmi fyrir breytta veglínu Sandskeiðs, Flæðavegar og Grundargötu. Við stofnun lóðar verður farið eftir 44. gr. skipulagslaga nr. 123/2010 um grenndarkynningu. Í framhaldi verður lóðin auglýst laus til umsóknar.
Samþykkt samhljóða með fimm atkvæðum.

Til máls tóku:
Katrín Sif Ingvarsdóttir.
Helgi Einarsson.
Felix Rafn Felixson.

Sveitarstjórn samþykkir með 5 atkvæðum ofangreinda bókun skipulagsráðs, Felix Rafn Felixson og Lilja Guðnadóttir sitja hjá.