Byggðaráð

a) Undir þessum lið komu á fund byggðaráðs Börkur Þór Ottósson, sviðstjóri umhverfis- og tæknisviðs, og Steinþór Björnsson, deildarstjóri Eigna- og framkvæmdardeildar, í gegnum fjarfund TEAMS kl. 13:00.

a.1 Börkur Þór og Steinþór kynntu tillögur sínar að niðurskurði í fjárhagsáætlun 2021 og þriggja ára áætlun 2022-2024 fyrir umhverfis- og tæknisvið og Eignasjóð.
a.2. Börkur Þór og Steinþór lögðu fram beiðni um tilfærslur á milli deilda í málaflokki 31 vegna viðhalds Eignasjóðs samkvæmt fjárhags- og viðhaldsáætlunum 2020.
a.3. Sviðsstjóri umhverfis- og tæknisviðs gerði grein fyrir kostnaðaráætlun vegna áfanga 2 hvað varðar götulýsingu og óskar eftir heimild til að ráðstafa svigrúmi í áætlun ársins 2020 vegna endurnýjunar á lýsingu á skólalóðar Dalvíkurskóla og við Íþróttamiðstöð samkvæmt fyrirliggjandi kostnaðaráætlun frá Raftákni, samanber málsnúmer 201909134 frá 327. fundi sveitarstjórnar þann 15. september sl.

Börkur Þór og Steinþór viku af fundi kl. 14:02.

b) Tillögur sviðsstjóra vegna breytinga á fjárhagsáætlun á milli umræðna í sveitarstjórn.

Til umræðu tillögur sviðsstjóra að hagræðingu og niðurskurði í rekstri og fjárfestingum vegna vinnu við fjárhagsáætlun 2021 og þriggja ára áætlun 2022-2023 að beiðni byggðaráðs.

Á 329. fundi sveitarstjórnar þann 24.nóvember sl. var eftirfarandi bókað:
"Á 344. fundi umhverfisráðs þann 20. nóvember 2020 var eftirfarandi bókað: Umhverfisráð leggur til að framlengja niðurfellingu á gatnagerðargjöldum samkvæmt ákvæði 1. mgr. 6. gr. til einstaklinga og fyrirtækja á lóðum við þegar tilbúnar götur til ársloka 2022. Ráðið leggur til að farið verði í kynningarátak á þeim lóðum sem eru til úthlutunar á þessum forsendum. Samþykkt samhljóða með fimm atkvæðum." Til máls tóku: Katrín Sigurjónsdóttir sem leggur til að þessum lið verði vísað til byggðaráðs til úrvinnslu vegna álitamála. Guðmundur St. Jónsson.
Sveitarstjórn samþykkir samhljóða með 7 atkvæðum ofangreinda tillögu Katrínar að vísa þessum lið til byggðaráðs til nánari útfærslu."

Með fundarboði byggðaráðs fylgdu drög að reglum Dalvíkurbyggðar vegna tímabundinnar niðurfellingu gatnagerðargjalda.

Til umræðu.

Formaður byggðaráðs datt tímabundið út af fjarfundi 15:37 og tók því ekki þátt í umfjöllun og afgreiðslu. Varaformaður tók við fundarstjórn.

Tekið fyrir erindi frá sviðsstjóra fjármála- og stjórnsýslusviðs þar sem óskað er eftir viðauka við fjárhagsáætlun 2020 vegna deildar 00100 að upphæð kr. -48.195.305 vegna hækkana á framlögum úr Jöfnunarsjóði samkvæmt áætlun sjóðsins.

Formaður byggðaráðs kom aftur inn á fundinn undir þessum lið kl. 15:40 og tók við fundarstjórn að nýju.

Tekin fyrir drög að erindisbréfi fyrir vinnuhóp vegna árlegrar endurskoðunar á Húsnæðisáætlun Dalvíkurbyggðar en sveitarstjóri leggur til að settur verði á laggirnar 3ja manna vinnuhópur vegna þessa verkefnis.

Tekið fyrir erindi frá Sveitarfélaginu Skagafirði, rafpóstur dagsettur þann 26.11.2020, þar sem upplýst er um bókun sveitarfélagsins frá fundi byggðaráðs Sveitarfélagsins Skagafjarðar frá 24.11.2020.

"Byggðarráð Sveitarfélagsins Skagafjarðar harmar þá stöðu sem upp er komin í málefnum Jöfnunarsjóðs sveitarfélaga. Reykjavíkurborg virðist ætla að halda til streitu kröfu á hendur Jöfnunarsjóði upp á um 8,7 milljarða króna fyrir meint vangoldin framlög úr sjóðnum. Þessari kröfu hefur þegar verið hafnað af hálfu ríkisins.
Ljóst er hins vegar að muni krafan ná fram að ganga þá eru það sveitarfélögin í landinu, í gegnum Jöfnunarsjóð, sem á endanum munu greiða kröfuna í formi skertra framlaga til þeirra eins og fyrri kröfur sem lent hafa á sjóðnum. Með því er ljóst að fjárhagsleg framtíð sveitarfélaga í landinu er í uppnámi sem og framtíð þess jöfnunarkerfis sem hingað til hefur verið sátt um á meðal sveitarfélaga landsins. Mörg sveitarfélög treysta að miklu leyti á framlög Jöfnunarsjóðs til að sinna þeim fjölmörgu verkefnum sem þeim eru falin og því ljóst að skerðing á framlögum til þeirra í gegn um jöfnunarkerfið mun gera mörgum sveitarfélögum ókleift að sinna þessum verkefnum. Það mun leiða til þess að þjónusta við íbúana mun skerðast verulega frá því sem nú er.
Flest sveitarfélög landsins takast nú á við mjög erfiða fjárhagsstöðu á árinu 2020 og jafnframt er flestum þeirra mikil áskorun að ná endum saman við gerð fjárhagsáætlunar fyrir árið 2021. Nái krafa höfuðborgar Íslands, sem byggð hefur verið upp af hálfu ríkisins og skattborgara landsins alls sem miðstöð stjórnsýslu, menningar, íþrótta og lista, fram að ganga er ljóst að rekstur sveitarfélaga landsins er í uppnámi um komandi framtíð.
Byggðarráð Sveitarfélagsins Skagafjarðar skorar á Reykjavíkurborg að draga kröfu sína til baka og leita annarra leiða gagnvart ríkisvaldinu til að ná fram þeirri leiðréttingu sem borgin telur sig eiga rétt á en í gegnum jöfnunarsjóð sveitarfélaga og þar með gagnvart sveitarfélögunum í landinu, með ófyrirséðum afleiðingum fyrir sveitarfélögin og íbúa þeirra. Byggðarráð skorar jafnframt á önnur sveitarfélög landsins að taka undir bókunina og gera að sinni."

Tekinn fyrir rafpóstur frá nefndasviði Alþingis þar sem Atvinnuveganefnd Alþingis sendir til umsagnar frumvarp til laga um Tækniþróunarsjóð, 321. mál. Þess er óskað að undirrituð umsögn berist eigi síðar en 11. desember nk.

Tekið fyrir erindi frá nefndasviði Alþingis, rafpóstur dagsettur þann 27. nóvember 2020, þar sem Atvinnuveganefnd Alþingis sendir til umsagnar frumvarp til laga um opinberan stuðning við nýsköpun, 322. mál.
Þess er óskað að undirrituð umsögn berist eigi síðar en 11. desember nk.

Lögð fram til kynningar fundargerð stjórnar SSNE frá 25. nóvember 2020.

Lögð fram til kynningar fundargerð stjórnar Sambands íslenskra sveitarfélaga frá 30.10.2020.