Samskipti við Vegagerðina vegna verkefna

Málsnúmer 202507055

Vakta málsnúmer

Byggðaráð - 1153. fundur - 31.07.2025

Sveitarstjóri fer yfir fund sem hún átti með starfsfólki Vegagerðarinnar þann 16.júlí sl.

Með fundarboð fylgdi bréf sveitarstjóra til Vegagerðarinnar sem var afhent á fundinum, minnispunktar sveitarstjóra eftir fund og fundargerð Vegagerðarinnar.

Á fundi sveitarstjóra með Vegagerðinni þann 16.júlí sl., kom m.a. fram að búið er að fresta framkvæmdum á Svarfaðardalsvegi (805) frá Tunguvegi að Göngustöðum. Gert er ráð fyrir rannsóknum á og í kringum veginn í ár og hönnun fari fram árið 2027. Framkvæmdir eru fyrirhugaðar á árunum 2028-2029, með fyrirvara um fjárveitingar.
Byggðaráð lýsir yfir miklum vonbrigðum með þá tilkynningu Vegagerðarinnar, að framkvæmdir við Svarfaðardalsveg sem áttu að hefjast á næsta ári seinnki um tvö ár. Það er hörmulegt að standa frammi fyrir þessari ákvörðun, þrátt fyrir ítrekaðar kvartanir á undanförnum árum á skorti á viðhaldi á þessum vegi, skorti á bundnu slitlagi sem og lélegum gæðum á því efni sem notað er við viðhald. Í október 2023 gaf SSNE út Samgöngu- og innviðastefnu Norðurlands eystra, þar kemur fram að Svarfaðardalsvegur er einn umferðarmesti malarvegurinn í landshlutanum. Í Svarfaðardal eru öflug bú sem þurfa þjónustu, það vinna margir utan býlis, íbúar þurfa að sækja þjónustu s.s. leik- og grunnskóla til Dalvíkur ásamt því að ferðaþjónustan fer vaxandi. Allt þetta hefur kallað á vegabætur í mörg undanfarin ár.

Fulltrúar Dalvíkurbyggðar verða á samráðsþingi með Innviðaráðherra 12.ágúst nk. á Múlabergi, Akureyri, sem haldið er í aðdraganda Innviðaþings sem haldið verður á Hilton Nordica í Reykjavík 28.ágúst nk.
Byggðaráð bendir á að samráðsþingið á Akureyri er öllum opið og hvetur áhugasama til þess að mæta.