Ráðstefna um úrgangsmál á norðurlandi.

Tekið fyrir erindi frá SSNE, kynning á ráðstefnu sem haldin verður 1. apríl 2020 kl 13-16.30 á Hótel KEA á Akureyri.
Ráðstefnan er um úrgangsmál í breiðum skilningi og er lokahnykkurinn á störfum starfshóps Samtaka sveitarfélaga á Norðurlandi vestra og Samtaka sveitarfélaga og atvinnuþróunar á Norðurlandi eystra sem hafði til skoðunar framtíðarskipan úrgangsmála á Norðurlandi.
Í vinnu hópsins var fjallað um úrgangsmál svæðisins og m.a. greindir úrgangsstraumar og tækifæri til að ná auknum árangri og hagræðingu í þessum viðamikla málaflokki. Á ráðstefnunni verða haldin fjölmörg áhugaverð erindi, m.a. um niðurstöður greiningar á úrgangsmálum á Norðurlandi, útflutning á sorpi, afsetningu lífræns úrgangs, úrgangsstjórnun hjá fyrirtækjum, líforkuver, smartvæðingu sorps, hringrásarhagkerfið, sjónarhorn sveitarfélags og fyrirtækis sem hafa náð árangri í úrgangsmálum o. fl. Guðmundur Ingi Guðbrandsson umhverfis- og auðlindaráðherra mun opna ráðstefnuna.

Sveitarstjórnarmenn á starfssvæðum þessara tveggja landshlutasamtaka eru hvattir til að mæta og auka þekkingu sína á þessum mikilvæga og aðkallandi málaflokki.