Breyting á skólahaldi frá og með 25. mars

Ágætu foreldrar

Í ljósi nýjustu tilmæla Almannavarna þarf að endurskoða skipulag skólastarfsins í Dalvíkurskóla frá og með miðvikudeginum 25. mars. Sóttvarnir eru forgangsmál hjá öllum í samfélaginu og eiga þær við alls staðar og alltaf. Hólfun skóla verður enn markvissari en verið hefur og tekið verður fyrir allan ónauðsynlegan samgang á milli þeirra hvort sem um nemendur eða starfsfólk er að ræða.

Skólastarfið verður því með eftirfarandi hætti:

1.-7. bekkur mætir áfram í skólann á sama tíma og verið hefur og fer heim á sama tíma.

8.-10. bekkur verður eingöngu í heima- og sjálfsnámi með aðstoð kennara og mætir ekki í skólann fyrr en annað verður gefið út. Kennarar munu fylgjast með náminu og aðstoða í gegnum síma eða tölvu.

Bestu þakkir fyrir ríkan skilning á stöðunni og það er gott að finna hvernig samtakamátturinn fleytir okkur áfram við aðstæður sem þessar.

Friðrik Arnarson

skólastjóri Dalvíkurskóla