Helga Kristín Sæbjörnsdóttir ráðin framkvæmdastjóri Menningarfélagsins Bergs til áramóta.

Helga Kristín Sæbjörnsdóttir hefur verið ráðin framkvæmdastjóri Menningarfélagsins Bergs ses til áramóta. Blikur eru á lofti varðandi heildarskipulag Menningarfélagsins og því ráðist í tímabundna ráðningu. Helga Kristín þekkir ágætlega til starfsemi hússins en hún starfaði í vetur í afleysingum á Söfnum Dalvíkurbyggðar og þá mest á bókasafni. Tíðir gestir hússins gætu því kannast við Helgu og ættu því ekki að kippa sér upp við það þó sjáist til hennar á handahlaupum.

Helga Kristín fluttist til Dalvíkur frá Laugarvatni ásamt fjölskyldu sinni síðasta sumar en þar hafði hún meðal annars starfað sem kennari, sem og við fag- og verkefnastjórn við Menntaskólann að Laugarvatni. Auk þess hefur hún unnið að verkefnastjórn ýmissa verkefna fyrir einstaklinga og fyrirtæki á suðvesturhorninu.

Um leið og við þökkum Jóhanni Má fyrir samstarfið í vetur bjóðum við Helgu Kristínu velkomna til starfa. Við erum spennt fyrir komandi misserum og hlökkum til að gæða húsinu lífi eftir takmarkanir síðustu tveggja ára.