Saga hússins

Í húsinu er fjölbreytt starfsemi en leitast er við að skapa veglega umgjörð og aðstöðu utanum hvers kyns menningarstarfsemi til dæmis listsýningar, tónlistarflutning og menningartengda ferðaþjónustu auk þess að bjóða upp á aðstöðu fyrir ráðstefnuhald.


Á aðalfundi Sparisjóðs Svarfdæla 2007 var tekin ákvörðun um að reisa menningarhús fyrir íbúa sveitarfélagsins. Í framhaldi af aðalfundinum gerðu Dalvíkurbyggð og Sparisjóðurinn með sér samkomulag um að Dalvíkurbyggð tæki að sér rekstur hússins fyrir hönd íbúa. Fyrstu skóflustunguna tók Þorgerður Katrín Gunnarsdóttir, þáverandi menntamálaráðherra, föstudag fyrir Fiskidag 2007. Í kjölfarið hófust framkvæmdir við húsið og var verkinu lokið 2009. Teiknistofan AVH sá um alhliða hönnun mannvirkisins og var Tréverk ehf. byggingaraðili.

Menningarhúsið Berg er rekið af sveitarfélaginu Dalvíkurbyggð.

Nafnið Berg.
Samkvæmt Íslensku orðsifjabókinni hefur orðið berg þessa skýringu: Klöpp, klettur eða hamrafjall og vísar nafnið þannig beint til útlit hússin sjálfs en það er klætt að utan með steinklæðningu og getur litið út eins og klettur eða berg. Eins er markmiðið með rekstri hússins að standa vörð um menningu og menningarstarfsemi í sveitarfélaginu á kraftmikinn hátt – eins og klettur.

Dalvíkurbyggð er á Tröllaskaganum og því einkennist umhverfið af fjöllum og því má segja að húsið hafi líka skírskotun til síns nánasta umhverfis en hér erum við umvafin bergi.