Fræðsluráð

Sviðsstjóri kynnti drög að nýjum samningi við Eyrúnu Svövu Ingvadóttur talmeinafræðing um talmeinaþjónustu við leik- og grunnskólabörn. Gildistími samningsins er tvö ár frá 1. sept. 2017 að telja með heimild til framlengingar um eitt ár.

Sviðsstjóri kynnti ályktun sem gerð var á samráðsfundi Félags stjórnenda leikskóla í september s.l. um stöðu barna sem eru í leikskólum á Íslandi. Þar er m.a. lýst áhyggjum af langri viðveru barna í leikskólum landsins.

Katrín Fjóla Guðmundsdóttir sagði frá tilurð læssisstefnunnar, Læsi er lykillinn, sem Skólaskrifstofa Akureyrar og Miðstöð skólaþróunar við Háskólann á Akureyri unnu í samstarfi við skóla á Eyjafjarðarsvæðinu, m.a. Dalvíkurskóla. Starfshópur um mótun læsisstefnu fyrir Dalvíkurbyggð leggur til að stefnan verði tekin upp sem læsisstefna Dalvíkurbyggðar og hefur fengið samþykki fyrir því hjá fræðslustjóranum á Akureyri og forstöðumanni Miðstöðvar skólaþróunar.

Sviðsstjóri kynnti bréf frá Sambandi íslenskra sveitarfélaga, dags. 29. sept, til skólastjóra og rekstraraðila grunnskóla þar sem kynnt er úthlutun úr Námsgagnasjóði.

Sviðsstjóri kynnti úthlutun úr Sprotasjóði að upphæð kr. 675.000 til þróunarverkefnis í Dalvíkurskóla sem ber heitið Hugarþjálfun er líkamsrækt hugans. Gunnhildur Helga Birnisdóttir, verkefnastjóri sérkennslu í 1.-8. bekk leiðir verkefnið.

Í lok fundar fóru fundarmenn í kynningarheimsókn í leikskólann Krílakot.