Veitu- og hafnaráð Dalvíkurbyggðar

Með rafpósti sem dagsettur er 28.05.2021, barst erindi frá Samgöngustofu um þá ákvörðun að stofnunin hefur mótað þær kröfur sem skimunarbúnaður fyrir öryggisleit vegna siglingaverndar þarf að uppfylla. Skipta má þessum kröfum í tvo þætti annars vegar í „Kröfur til búnaðar sem notaður er við öryggisleit á einstaklingum og farangri sbr. reglur nr. 550/2004 um fyrirkomulag öryggisleitar hafnaryfirvalda vegna siglingaverndar“ og hins vegar í „Kröfur til viðhalds og eftirlits með búnaði sem notaður er við öryggisleit á einstaklingum og farangri sbr. II viðauka fylgiskjals í reglugerð 474/2007 um vernd skipa og hafnaraðstöðu“.

Í bréfi Hafnasambans Íslands, frá 08.06.2021, kemur eftirfarandi fram: "Hafnasambandið er að hefja vinnu við úttekt á nýframkvæmda- og viðhaldsþörf hafnarmannvirkja um land allt. Sumarstarfsmaður sambandsins, Sesselía Dan Róbertsdóttir hagfræðingur, mun annast gagnaöflun og skýrslugerð sem stefnt er á verði tilbúin á haustdögum.Það er mat Hafnasambandsins að brýnt sé að safna saman á einn stað ítarlegum upplýsingum um almenna viðhaldsþörf hafnarmannvirkja og öllum áformum um framtíðaruppbyggingu næstu ár. Málefni hafna þurfa að fá meiri þunga í almennri umræðu um samgöngumál og um leið skilning stjórnvalda á mikilvægi hafnarþjónustu og öruggum og nútímalegum hafnarmannvirkjum um land allt."

Tekið fyrir erindi frá Þorsteini Björnssyni, sviðsstjóra, dagsett 3. júní 2021 og minnisblað dagsett 10.06.2021. Þar tekur hann saman kostnað við framkvæmdir í frístundabyggðinni að Hamri. Búið er að úthluta sex lóðum í hverfi B9 undir sumarhús og því er nauðsynlegt að fara í slóðagerð og lagnavinnu sem fyrst.Það sem snýr að veitu- og hafnaráði er niðursetning rotþróar og lagnavinna vegna vatnslagnar, fylgdi uppdráttur erindi sviðsstjóra. Áætlaður kostnaður við rotþró og lagnir eru um kr. 2.000.000,- og vatnslagnir kr. 700.000,-. Ekki er gert ráð fyrir þessum kostnaði í fjárhagsáætlun 2021 og því fylgdi erindinu beiðni um viðauka sem yrði mætt með lækkun á handbæru fé.

Með bréf, sem dagsett er 7. maí 2021, „fer ráðuneytið fram á að gjaldskrá vatnsveitu sveitarfélags verði yfirfarin að nýju með hliðsjón að leiðbeiningum ráðuneytisins. Fer ráðuneytið þess á leit að verða í framhaldinu upplýst um niðurstöðu sveitarfélags hvað varðar forsendur fyrir þeim útreikningum sem gjaldskrá vatnsveitunnar um álagningu vatnsgjalds er byggð á, sbr. 10 gr. laga um vatnsveitu sveitarfélaga. Jafnframt fer ráðuneytið fram á að verða upplýst um langtímaáætlun vatnsveitunnar, sbr. 10 gr. reglugerðar nr. 401/2005.Telji sveitarfélagið að lokinni yfirferð sinni að ekki sé ástaða til að uppfæra gjaldskrá vatnsveitunnar er farið frá á að sú niðurstaða verði rökstudd í svari til ráðuneytisins.“Þetta mál er nú til skoðunar hjá Samorku, fyrir hönd allra vatnsveitna landsins.

Á fundinum voru kynntar niðurstöður vatnssýna sem Heilbrigðiseftirlit tók 04.06.2021, fyrir Vatnsveitu Dalvíkurbyggðar. Sýnin voru tvö, annað tekið á Dalvík og hitt á Hauganesi og voru þau bæði í lagi.

Unnið hefur verið að rennslismælinum í Brimnesá nú í um ár og hefur gengið nokkuð vel að afla þeirra gagna um rennsli í ánni sem hægt er að nota til samanburðar við rennsli í Þorvaldsdalsá. Á fundinum voru kynnt þau áform sem áætlað er að vinna eftir í ár. Þessi virkjun hefur fengið vinnuheitið Brimnesárvirkjun og vonandi verða menn sáttir við það.

Sviðsstjóri fór yfir stöðu framkvæmda á veitu- og hafnasviði á árinu 2021.