Umhverfisráð

Steinþór Björnsson, deildarstjóri EF-deildar kom á fundinn kl. 08:15.Tekin fyrir samantekt deildarstjóra EF deildar á viðhaldi gatna og gangstétta. Búið er að gera við verstu svæðin en nokkur svæði eru það illa farin eftir veturinn að nauðsynlegt er að bregðast við. Fjárheimildir á fjárhagsáætlun ársins eru langt komnar.Umhverfisráð fór yfir listann með sviðsstjóra og forgangsraðaði verkefnum.

Tekið fyrir erindi frá Þorsteini Björnssyni, sviðsstjóra, dagsett 3. júní 2021. Þar tekur hann saman kostnað við framkvæmdir í frístundabyggðinni að Hamri. Búið er að úthluta sex lóðum í hverfi B9 undir sumarhús og því er nauðsynlegt að fara í slóðagerð og lagnavinnu sem fyrst.Það sem snýr að umhverfisráði er slóðagerð og fylgdi uppdráttur erindi sviðsstjóra. Áætlaður kostnaður við slóðagerðina er 4 milljónir króna. Ekki er gert ráð fyrir þessum kostnaði í fjárhagsáætlun 2021 og því fylgdi erindinu beiðni um viðauka sem yrði mætt með lækkun á handbæru fé.

Tekið fyrir deiliskipulag Hauganess, íbúða- og hafnarsvæði.

Tekið fyrir erindi frá Arkibygg í umboði lóðarhafa að Skógarhólum 11 á Dalvík, dagsett 27. maí 2021, ósk um breytingu á deiliskipulagi Hóla- og Túnahverfis.Í gildandi deiliskipulagi er gert ráð fyrir aðkomu að raðhúsunum frá norðri.Sótt er um breytingu þannig að aðkoma að raðhúsunum verði frá suðri. Samhliða þessu er sótt um að færa byggingarreit um 4 metra til norðurs. Breytingartillagan gerir ráð fyrir að gengið sé inn í húsin frá suðri og 2 bílastæði séu fyrir framan hvert hús að sunnan.

Með fundarboði fylgdi greinargerð ásamt skipulagsuppdráttum að þjóðvegi í þéttbýli Dalvíkur frá EFLU verkfræðistofu en verkefnið er samstarfsverkefni með Vegagerðinni.Einnig fylgdi minnisblað frá EFLU vegna möguleika á hönnun krossgatnamóta Karlsrauðatorgs, Hafnarbrautar / Gunnarsbrautar.

Tekið fyrir erindi frá Vegagerðinni dagsett 1. júní 2021 vegna samstarfsverkefnis við Dalvíkurbyggð um vinnu við skipulag þjóðvegakerfisins í gegnum Dalvík.Í skipulagsvinnunni er horft til þess að færa veglínu til við Karlsrauðatorg 6 til að auka umferðaröryggi og bæta flæði annarra vegfarenda um svæðið.Vegagerðin leitar samstarfs við Dalvíkurbyggð um möguleg uppkaup á fasteigninni að Karlsrauðatorgi 6 til niðurrifs en það er í raun forsenda þess, að hægt verði að færa veglínuna og auka þar með vegsýn og umferðaröryggi.

Helga Íris Ingólfsdóttir, skipulags- og tæknifulltrúi, kynnti samskipti sín við Þjóðskrá vegna skráningar lóða í frístundabyggðinni að Hamri. Skráningin er óþjál þar sem gata við umræddar lóðir er skráð undir heitinu B3. Sveitarfélagið hefur heimildir til að ákvarða götunöfn án þess að það kalli á deiliskipulagsbreytingu. Nýtt götuheiti verður nýtt örnefni og mun verða til umfjöllunar hjá Örnefnanefnd Árnastofnunar.

Til umfjöllunar endurskoðun aðalskipulags Dalvíkurbyggðar 2008-2020. Verið er að vinna að flokkun landbúnaðarlands samkvæmt nýjum viðmiðum Skipulagsstofnunar og uppfæra Minjaskrá. Fyrir liggur að vinna þarf að uppfærðri skráningu á efnistöku- og efnislosunarsvæðum, auk staðsetningar iðnaðar- og athafnasvæða.