Íþrótta- og æskulýðsráð

Viktor Már Jónasson, forstöðumaður Víkurrastar kom á fundinn kl. 8:15. Viktor gerði grein fyrir þeirri starfsemi sem hefur farið fram og því sem framundan er í Víkurröst í vetur. Einnig gerði hann grein fyrir sameiginlegum atburði félagsmiðstöðva á Eyjafjarðarsvæðinu sem fram fór á Dalvík helgina 31. október til 1. nóvember.
Jón Ingi Sveinsson kom á fundinn kl. 8:35.

Þórunn Andresdóttir vék af fundi undir þessum lið.

Tekið var fyrir erindi frá Valgerði Hrönn Ingvarsdóttur sem barst íþrótta- og æskulýðsfulltrúa með rafpósti 23.10.2014. Óskar hún fyrir hönd foreldra barna sem búa á Árskógströnd eftir umræðu og ákvörðun um það hvort Dalvíkurbyggð geti komið til móts við þau varðandi akstur barna í félagsmiðstöðina Tý á Dalvík. Félagsmiðstöðin er opin á mánudags- og miðvikudagskvöldum og annað hvert föstudagskvöld.

Forstöðumanni Víkurrastar og íþrótta- og æskulýðsfulltrúa er falið að funda með foreldrum barna sem búa utan þéttbýlis í sveitarfélaginu.
Þórunn Andresdóttir kom á fundinn aftur kl. 9:00.
Viktor vék af fundi kl. 9:00.

Íþrótta- og æskulýðsfulltrúi kynnti nýjustu teikningar að endurbótum sundlaugar en þær eru umfangsminni en síðustu teikningar. Brýnast þykir að lagfæra sundlaugarkerið sjálft. Íþrótta- og æskulýðsráð tilnefnir Kristinn Inga Valsson sem fulltrúa nefndarinnar í vinnuhóp um endurbæturnar.

Dalvíkurbyggð og Embætti landlæknis hafa gert með sér samstarfssamning um þróunarverkefnið Heilsueflandi samfélag. Verkefnið miðar að því að efla lýðheilsu og lífsgæði íbúa Dalvíkurbyggðar með markvissum þverfaglegum heilsueflingaraðgerðum.

Markmið verkefnisins eru að:
a)
Koma á fót heilsueflandi samfélagi með öflugu lýðheilsustarfi í þágu fólks á öllum æviskeiðum
b)
Nýta fjölbreyttar, markvissar og heildrænar aðgerðir til að auðvelda fólki að taka heilsusamlegar ákvarðanir og lifa heilbrigðu lífi.
c)
Vekja athygli á og draga úr ójöfnuði hvað varðar heilbrigði og lifnaðarhætti.
d)
Draga úr tíðni og afleiðingum langvinnra sjúkdóma með margvíslegu forvarnar- og heilsueflingarstarfi.

Verkefnið miðar að því að þróa samfélagslegan ramma utan um markvissa og heildræna heilsueflingu allra aldurshópa. Hann mun innihalda m.a. gátlista, viðmið og árangursmat auk tækja og tóla í verkfærakistu "Heilsueflandi samfélags" sem nýst getur í öðrum samfélögum á Íslandi.

Samstarfið beinist einkum að áhrifaþáttum heilbrigðis sem eru lagðir til grundvallar eftirfarandi fjórum áhersluþáttum:
Hreyfing
Næring
Líðan
Lífsgæði

Samningurinn lagður fram til kynningar.

Íþrótta- og æskulýðsráð leggur áherslu á að starfshópur skili innleiðingaráætlun fyrir fyrsta árið í desember.

Búið er að ráða Gauta Sigurpálsson svæðisstjóra á skíðasvæðið. Mun hann hefja störf 17. nóvember 2014. Gert er ráð fyrir að svæðisstjórn verði kölluð saman mjóg fljótlega eftir að svæðisstjóri kemur til starfa. Auk svæðisstjóra eiga íþrótta- og æskulýðsfulltrúi og fulltrúi stjórnar skíðafélagsins sæti í svæðisstjórninni.