Undanfarin ár hefur nemendum 6. bekkjar boðist einstakt tækifæri til að upplifa sjómennsku af eigin raun, sjá hvernig það er að ferðast á sjó og veiða og fræðast um fisk og sjávarútveg með eikarbátnum Húna II. Þessi ferð, sem nefnist Frá öngli í maga, er samstarfsverkefni Hollvina Húna II, Akureyrarbæjar, Samherja og auðlindadeildar Háskólans á Akureyri.
Á meðan á siglingunni stendur fá nemendurnir að kynnast skipinu, fræðast um sögu þess og læra ýmislegt um störf og líf sjómanna ásamt því að veiða. Einnig er um borð sjávarútvegsfræðingur frá Háskólanum á Akureyri sem slægir fiskinn og flakar fyrir framan krakkana og útskýrir fyrir þeim á meðan. Að lokum er svo aflinn grillaður um borð.
Húni II hefur í gegnum tíðina verið mikilvægur hluti af sjávarútvegssögu og menningu landsins. Fyrir krakkana er því ekki aðeins um skemmtilega siglingu að ræða heldur einnig tækifæri til að læra á annan hátt en í hefðbundinni kennslustofu.
Að þessu sinni lék veðrið við krakkana, fjörðurinn var spegilsléttur og mátti varla finna að þeir væru um borð í skipi. Vel veiddist og voru krakkarnir duglegir að borða fiskinn! Við hlökkum svo sannarlega til næstu Húnaferðar að ári.
