Undanfarið hefur verið unnið að uppsetningu á varaaflstöð á Brimnesborgum, virkjunarsvæði Hitaveitu Dalvíkur á Árskógsströnd. Markmið er að tryggja vinnslu og dreifingu á heitu vatni til viðskiptavina hitaveitunnar.
Ef rafmagnslaust verður tekur það varaflgjafann 1 mín að taka yfir dælinguna. Hann slekkur svo sjálfkrafa á sér fljótlega eftir að rafmagn kemst á aftur.
Með þessari framkvæmd er búið að tryggja stöðugt framboð á heitu vatni á þjónustusvæði Brimnesborga, en þær þjóna Árskógsströnd og þeim hluta Svarfaðardals sem hefur hitaveitu.