"Ég skal vera dugleg" bókakynning á Við höfnina

Sunnudaginn 3. maí næstkomandi kl.15:00 verður bókakynning "Við höfnina", Dalvík. Þá mun Lovísa María Sigurgeirsdóttir lesa upp úr nýútkominni bók sinni "Ég skal vera dugleg"

Til allrar hamingju er það ekki hlutskipti margra lítilla barna að dvelja langdvölum á sjúkrahúsi, fjarri fjölskyldu og vinum. Það fékk þó Lovísa María Sigurgeirsdóttir frá Hrísey að reyna og í bókinni Ég skal vera dugleg rifjar hún upp dvöl sína á Fjórðungssjúkrahúsinu á Akureyri þegar hún var lítil stelpa upp úr 1960.

Á einlægan hátt lýsir Lovísa María líðan sinni innan veggja sjúkrahússins og þeim heimi sem þar var, heimi sem einkenndist jafnt af æðruleysi og örvæntingu – sorgum og sigrum. Hún segir frá söknuðinum, framandleikanum og kynnum sínum af börnum og gömlu fólki sem hún tengdist órjúfanlegum böndum. Sumir náðu sér og kvöddu með bros á vör – aðrir kvöddu þetta líf.

Lóa Maja fékk bót meina sinna en gleymir aldrei Tóta og öllum hinum sem kenndu henni að meta hinar margvíslegu hliðar mannlífsins.

Í bókinni eru ljósmyndir frá æskuárum höfundarins og teikningar eftir systur hennar, Guðbjörgu Sigurgeirsdóttur.
Hönnun bókar og kápu var í höndum Guðrúnar Birnu Ólafsdóttur. Prentsmiðjan Ásprent á Akureyri annaðist prentvinnslu. Bókin er harðspjalda og 120 bls. Salka gefur út.